Samandráttir frá 10. umfari

MENN: Hóast Skála hevði stórar málmøguleikar, so kom bara tað eina málið, sum Cedric Yambere skoraði í 1-0 sigrinum hjá KÍ.

Emil Pedersen og Magnus Isager skoraðu málini í 2-0 sigrinum hjá 07 Vestur á EB/Streymi. Sundalagsmenn høvdu fleiri stórar møguleikar, men tað eydnaðist ikki at skora nakað mál í dag.

Botnliðini, ÍF og B68, spældu aftur í dag javnleik, hesaferð 2-2. Tað líktist einum B68 sigri, men Elvio Gelmini javnaði, tá 94. minuttir vóru farnir.

Hóast NSÍ spældi í ein hálvan tíma við tíggju móti ellivu, hildu teir leingi oddaliðið, Víking frá at skora. Men í tíðini sum dómarin hevði lagt afturat skoraði Víkingur tvær ferðir. Poul Kallsberg og Martin Klein stóðu fyri málunum.

HB eltir enn fyrsta plássið. Í dag vann HB 2-1 á grannunum úr B36. Mikkel Dahl legði HB á odda í fyrra hálvleiki, Marius Kryger Lindh javnaði í seinna hálvleiki fyri B36, og tá 69. minuttir vóru farnir skoraði Viljormur Davidsen sigursmálið fyri HB við beinleiðis frísparki.